Ayon sa teyoryang solar nebular, ang mundo at ang solar system ay nabuo mahigit apat na bilyong taon ang nakalipas. Ayon sa sayantipikong teyorya, nagkaroon ng isang napakalawak na nebula na binubuo ng mga alikabok at gas na nagsama-sama dahil sa puwersa ng gravity. Nang uminit ang gitna ng solar nebula na patuloy na nasisiksik dahil sa mga nagsama-samang alikabok at gas, patuloy itong naging flat at umikot-ikot hanggang mabuo ang protoplanetary disk ilang milyong taon ang nakalipas kung saan nabuo ang mga planeta kasama ang mundo. Ang mga siksik na planeta ay nabuo malapit sa araw at mga planetang puro gas ay nabuo sa labas na bahagi ng solar system.
