Answer:
Ang naturalisadong Pilipino ay mga dating dayuhan na naging mamamayang Pilipino dahil sa proseso ng naturalisasyon. Ayon sa Commonwealth Act No. 475, ang isang dayuhan ay maaaring maging mamamayang Pilipino sa pamamagitan ng naturalisasyon. Ang naturalisasyon ay isang legal na paraan kung saan ang isang dayuhan na nais maging mamamayan ng isang bansa ay sasailalim sa isang proseso sa korte o hukuman. Kapag nabigyan na ng pagkamamamayang Pilipino ang isang dayuhan, kailangan niyang sumunod sa mga batas at kultura ng bansa. Matatamasa rin niya ang mga karapatan ng isang mamamayang Pilipino maliban sa mahalal sa matataas na posisyon sa pamahalaan ng bansa.
Mga Katangian ng Isang Dayuhan na nais Maging Naturalisadong Pilipino
1. Siya ay dalawampu’t isang taong gulang na.
2. Siya ay naninirahan sa Pilipinas nang tuloy- tuloy sa loob ng sampung taon. Ito ay maaaring maging limang taon na lamang kung:
a. Ipinanganak siya sa Pilipinas;
b. Nakapag-asawa siya ng isang Pilipino;
c. Nakapagturo siya ng dalawang taon sa pribado o pampublikong paaralan; at
d. Mayroon siyang bagong industriya o nakagawa ng isang bagong imbensyon sa Pilipinas.
3. Siya ay may mabuting pagkatao.
4. Naniniwala siya sa Saligang Batas ng Pilipinas.
5. May matatag siyang hanapbuhay at may ari-arian sa Pilipinas.
6. Nakapagsasalita at nakasusulat siya ng wikang Pilipino.
7.Tinatanggap niya ang kulturang Pilipino.
8. Pinag-aaral niya ang mga anak sa mga paaralang nagtuturo ng kultura at kasaysayan ng Pilipinas.
Mga Prinsipyo ng Pagkamamamayang Pilipino ayon sa Kapanganakan
Jus sanguinis ang pagkamamamayan kung naaayon sa dugo o pagkamamamayan ng mga magulang o isa man sa kanila.
Jus soli - naman ay naaayon sa lugar ng kaniyang kapanganakan anuman ang pagkamamamayan ng kaniyang mga magulang
Pagkawala ng Pagkamamamayang Pilipino
Ang pagkamamamayang Pilipino ay maaaring mawala, kusang-loob man ito o sapilitan. Ayon sa ating batas, maaaring mawala ang pagkamamamayan sa pamamagitan ng mga ito:
1.Naging naturalisadong mamamayan siya ng ibang bansa.
2.Naglingkod siya sa sandatahang lakas ng ibang bansa.
3.Sumumpa siya ng katapatan sa Saligang Batas ng ibang bansa pagsapit niya ng 21 taong gulang.
4.Nagpawalang-bisa siya ng naturalisadong pagkamamamayang Pilipino
5.Napatunayan siyang tumakas sa hukbong sandatahan ng ating bansa at kumampi sa kaaway sa panahon ng digmaan 6. Itinakwil niya ang kaniyang pagkamamamayan at nag angkin ng pagkamamamayan ng ibang bansa (expatriation)
Muling Pagkakamit ng Pagkamamamayang Pilipino
Ang isang Pilipino na nagdesisyong maging naturalisadong mamamayan ng ibang bansa ay maaaring maging Pilipino muli sa pamamagitan ng sumusunod na mga paraan:
1.Muling naturalisasyon
2.Aksiyon ng Kongreso
3.Pagbabalik sa Pilipinas at muling pagsumpa ng katapatan sa Republika ng Pilipinas
4.Pagpapatawad sa hatol ng hukuman sa isang tumakas na miyembro ng Sandatahang Lakas
