Panuto: Basahin ang maikling sanaysay at isulat sa patlang kung ang pahayag ay
isang paglalahad, paglalarawan, pagsasalaysay o pangangatuwiran.
Munting Komunidad
_______________(1) Malalapad na lansangan, dikit-dikit na kabahayan, paroo’t
paritong mga taong abala sa pagpunta sa pamilihan, tila parada ng mga motorsiklo
na naglipana sa alinmang lugar, mga batang nagsasaranggola, mga nagtutulak ng
kariton sa pagtitinda ng samu’t saring gulay, prutas, fishball, kakanin, taho, ukay-
ukay at iba pa, mga drayber ng traysikel na matiyagang naghihintay ng pasahero,
mga deliberi trak na humihinto sa ilang mga tindahan, mga aso’t pusang
nakikipagkarerahan sa bawat lansangan, mga pulis at tanod na rumoronda, mga
nagdedeliber ng tubig, softdrinks at pagkain ay ilan lamang sa araw-araw nating
nakakasalamuha sa simula pa lang ng pagmulat ng ating mga mata. Ito ang
munting komunidad ng mga taga Southville 3 dito Poblacion, Muntinlupa.

_______________(b) Ang munting komunidad na ito ay nagkaroon ng katuparan
nang dahil sa pangunguna ng pambansang pamahalaan sa tulong na rin ng
pamahalaang lokal ng Muntinlupa. Noon ay naninirahan ang karamihan sa
pamilya rito sa tabi ng riles. Dahil na rin sa kagustuhan ng mga mamamayan sa
tabi ng riles na magkaroon ng disenteng bahay, napapayag sila na lumipat dito sa
Southville 3. Taong 2008 nang magsimulang magsilipat rito ang mga tao mula sa
riles. Hindi naging madali para sa lahat na mamuhay sa bago nilang tirahan,
malayo sa nakagisnang buhay sa tabi ng riles pero sa Awa ng Diyos, lahat ay
naisaayos. Naipatayo unti-unti ang mga paaralan, pamilihan, gusali ng
pamahalaang barangay, terminal ng mga sasakyan, pagamutan at marami pang
iba. Sa lahat ng ito, kakikitaan ng tuloy-tuloy na pag-unlad ang munting
komunidad.

_______________(c) Sa mga nagsasabing magulo ang munting komunidad na ito,
nagkakamali sila. Isa lamang maling paniniwala ang ganitong sabi-sabi. Nais
lamang nilang sirain ang magagandang nasimulan ng pamahalaan at ng mga tao
rito. Ang anumang gulo o insidente na nagaganap sa loob ng Southville 3 ay
karaniwan ding nagaganap sa maraming lugar. Pag-aaway ng kabataan, awayan
ng mga kapitbahay, insidente ng nakawan at iba pang katulad nito ay gaya rin ng
nagaganap sa maraming komunidad. Ang pagdami ng naninirahan dito, ang
paglago ng hanapbuhay at ang pagdami ng ipinapatayong establisyemento at
inprastraktura ay mga patunay na walang dapat ikatakot ang publiko sa munting
komunidad.

_______________d) Sa lahat ng mga naninirahan sa munting komunidad na ito,
mapanatili nawa ng bawat isa ang kaayusan at kapayapaan para sa mas maunlad
na komunidad sa hinaharap. Tandaan lang natin, ang ilang mga bagay na dapat
isaisip ng bawat isa para sa mas maunlad pang komunidad. Panatilihin ang
kalinisan sa loob at labas ng bahay at sa buong komunidad, iwasan ang
masangkot sa away lalo na sa kapitbahay, makibagay sa mga taong madalas mong
nakakasalamuha, makipagkapwa-tao, tumulong sa pamunuan ng komunidad sa
mga programa at proyektong kanilang isinusulong at higit sa lahat patatagin ang
aspetong ispiritwal sa mga sarili.