Sa panahon ngayon kung kailan mahirap at mahal ang magkasakit, bilang isang responsablen mamamayan nararapat na pagtuunan natin ng pansin ang ating kalusugan. Kadalasan, ang timbang ng isang tao ay isang malinaw na indikasyon sa estado ng kalusugan ng isang tao. Kapag labis o kulang naman ang timbang, ito ay makakapagsabi na may hindi tama sa iyong kalusugan. Maaaring may mga nutrisyon na kulang o sobra na kailangan ng katawan. Ang pagkakaroon ng wastong timbang batay sa edad at laki ay malinaw na senyales na maganda ang kalagayan ng kalusugan. Ang wastong timbang ay makukuha kapag kumakain tayo ng tamang uri ng pagkain na may sapat na sustansiya at sinasabayan ng tama at regular na ehersisyo. Ang sapat na dami ng nutrisyon na nakukuha at regular na ehersisyo ay isang magandang kombinasyon upang mapanatiling wasto ang timbang ng isang tao.
