Ang pagkakaroon ng
napakaraming uri ng kapaligirang likas ay kakanyahan ng Asya. Mahalagang
maunawaan mo na ang kontinente ng Asya ay biniyayaan at nagtataglay ng iba’t
ibang anyong lupa at anyong tubig na lubos na nakakaapekto sa takbo ng
pamumuhay ng mga Asyano.
Bukod sa
pinakapangunahing lugar panirahan ng tao, ang biyayang hatid ng mga anyong lupa
sa tao ay nakapagdulot ng malaking impluwensya sa kanilang kultura at
pamumuhay. Ang mga bulubundukin ay nagsisilbing likas na tanggulan o depensa ng
isang lugar, at proteksyon o harang sa malalakas na bagyo at sigwa. Ang ilang
mga disyerto, baybay-gilid, at mga kabundukan sa iba’t ibang bahagi ng Asya ay
nagtataglay ng samu’t-saring yamang mineral - mga metaliko, di-metaliko, at
gas.
Sa mga
bundok at gubat ay nakukuha ang mga bungang kahoy, mga herbal na gamot, at mga
hilaw na materyales, bukod sa panirahan ng mga hayop, lalo na ng wildlife.
Binubungkal, sinasaka at nililinang ng tao ang mga kapatagan at mga lambak para
sa mga pananim, ang mga damuhan at mga burol ay ginagawang pastulan. Ang
paggamit ng tao sa ibat’ibang uri ng anyong lupa ay nakapag-ambag sa paghubog
ng kanyang uri ng pamumuhay at ng kabihasnan.
Gaya ng
ginawang paglinang ng mga taong nagpasimula ng mga sinaunang kabihasnan, ang
mga lawa at ilog ay ang siyang pinagkukunan ng tubig bilang inumin at ginagamit
sa pang-araw-araw na gawain. Ito rin ang pinagmumulan ng sistema ng irigasyon
sa mga palayan at pananiman, daanan ng mga transportasyong pangtubig, at pinagkukunan
ng mga pagkain at mga palamuti.
