Answer:
PARABULA (PARABLE)
Ang parabula o talinghaga ay isang karaniwang maikling kwento na naglalarawan ng moral na saloobin o espirituwal na aralin. Kadalasan, ito'y hango sa mga kwento ni Hesus na itinala sa Bibliya. Ang mga salaysay nito ay malimit na nagpapayo tungkol sa isang pangyayari at isinasalarawan ang isang relihiyosong prinsipyo.
Halimbawang parabula mula sa Silangang Asya
PARABULA NG BANGA
SALIN
ni
eddie lauyan de fiesta esteban
"Huwag mong kalilimutang ikaw ay isang bangang gawa sa lupa na nararapat makisalamuha lamang sa bangang gawa rin sa lupa” ang tagubilin ng Inang Banga sa kanyang anak. "Bakit madalas ninyong sinasabi sa akin ito, Ina?" nagtatakang tanong ng anak."Sapagkat iyon ang nararapat, upang ito’y tumatak sa iyong isipan.
Gaya ng nais ng ina, ang pananaw na ito ay kumintal sa kanyang isip pero laging naroon ang tanong sa sarili, “bakit siya ay di maaaring makisalamuha sa ibang banga?”
Dumating ang makabagong panahon, nagsulputan ang iba’ibang uri ng banga, naggagandahan. Mga bangang gawa sa porselana, bangang gawa sa makintab na metal. Ang makisalamuha sa mga ito ay sumagi sa kanyang isipan, kaya lamang, ang bilin ng ina na nakapagkit na sa katauhan ang siyang pumipigil.
Isang araw, isang lalaking porselanang banga na may kakaibang disenyo, may gintong dahong hawakan, may matitingkad na kulay ang sa kanya’y nag-imbitang maligo sa lawa. Datapuwa’t sa una pa lang ay agad naakit sa lalaki, ang imbitasyon ay kanyang tinanggihan. Isinang-alang-alang ang paggalang sa ina.
Ang imbitasyon ng lalaki ay naulit, muling naulit na lagi niyang tinatanggihan. Kaya lamang masigasig ang lalaki, hindi ito tumigil sa kaiimbita.
Muli siyang inukilkil ng dating tanong sa sarili, “bakit di ako maaaring makisalamuha sa ibang banga?” Di napigilang mag-isip, Oo nga’t gawa sila sa ibang materyal, ganunpaman pare-pareho pa rin kaming mga banga. Hinulma kami na iisa ang dahilan, ang kami ay maging sisidlan, isang pandekorasyon”. Ah, inay, tingin ko, ikaw ay nagkakamali.”
Ang huling imbitasyon ng lalaking banga ay hindi na niya tinanggihan. Katwiran niya’y wala namang masama kung siya ay sasamang maligo sa lawa.
Pagdating sa lawa, lumusong ang dalawa, nadama nila ang ginhawang dulot ng malamig na tubig nito. Masaya si BANGANG GAWA SA LUPA, Masaya ang BANGANG PORSELANA.
Nagkatuwaan ang dalawa na sabay dumayb, ang kanilang sabay na pagdayb ay lumikha ng alon, along naging dahilan upang sila ay magkabanggaan. Banggaang ikinabasag ni BANGANG GAWA SA LUPA samantalang hindi man lamang nagalusan si BANGANG PORSELANA.
LOLO PILO: Madalas, ang pagsuway sa utos ng ating mga magulang ang ating ikinapapahamak.
Bago gawin ang isang bagay, isipin muna natin ng makasampung beses.
“Ang tumatakbo nang matulin, kung matinik ay malalim.”
Sa Ingles: “Haste makes waste.”
W A K A S
