Dahil napapanahon ito at nais kong makatulong sa pagmulat ng mga mamamayan tungkol sa maling pagtrato sa isang tao dahil lang iba ang kanyang lahi. Nang marinig at makita sa social media ang tumataas na kaso ngayon ng pang-aabuso sa mga Asyano sa ibang bansa o Asian Hate, naisip kong gawin ang aking parte sa pagpigil nito sa pamamagitan ng pagpapalawig sa isip ng tao at pagbibigay sa kanila ng sapat na kaalaman upang mapagtanto nila na mas mahalagang yakapin ang ating pagkakaiba-iba kaysa gumawa ng isyu tungkol dito. Gusto kong ipaabot sa kanila ang aking mensahe na, "Mapa-itim, puti, kayumanggi, o anumang kulay sa pagitan man yan, Asyano, Europeo, Amerikano, o anumang lahi pa, lahat tayo ay nilalang ng Diyos para magsama-sama sa mundong ito at magmahalan. Walang kulay ng balat o lahi ang mas nakahihigit sa iba kaya wala tayong karapatang gawing katatawanan o kasalanan ang pagiging kakaiba."
