Mayroong iba't ibang pakahulugan ang nasyonalismo. Kadalasang kahulugan ng nasyonalismo na ating nakikita sa mga aklat ay nagsasaad na ito ay ang damdaming makabayan na maipapakita sa matinding pagmamahal at pagpapahalaga sa Inang bayan. Para sa karamihan, ito ay ang pagmamahal sa bansang kinabibilangan. Ang pagmamahal na ito ang sinasabing siyang nagbibigkis sa mga mamamayan ng isang bansa. Nakikita ang nasyonalismo sa pagkakaisang naipamamalas ng pagtutulungan at pagkakabuklod sa iisang kultura, saloobin at hangarin. Ang pagtangkilik ng sariling produkto, ideya, at kultura ay isa ring manipestasyon ng pagmamahal na ito sa bayan. Ang pagiging makatwiran at makatarungan ay pagpapakita ng nasyonalismo.
